Katër djem të vrarë në oborr, dëshmia rrëqethëse e babait nga Drenica

Në 28-vjetorin e masakrave në Likoshan dhe Qirez, një dëshmi e rëndë vjen nga një prej të mbijetuarve, Shermet Sejdiu, babai nga Drenica, të cilit forcat serbe ia vranë katër djemtë në oborrin e shtëpisë.

Me zërin që i dridhet nga dhimbja, ai rikujton ditën kur familja e tij u godit nga tragjedia, një ngjarje që la gjurmë të pashlyeshme në historinë e Kosovës.

Sipas rrëfimit të tij, ngjarja ndodhi më 28 shkurt 1998. Atë ditë, ai ndodhej në Prishtinë, por pasi dëgjoi për përleshjet e armatosura në Prekaz dhe Llaushë, u nis menjëherë drejt Drenicës. Për shkak të rrethanave, u detyrua të strehohej në një mal në afërsi, nga ku pa shtëpi të djegura dhe granatime të pandërprera.

Në oborrin e shtëpisë së tij u vranë katër djemtë: Beqir Sejdiu (26), Nazmi Sejdiu (24), Bedri Sejdiu (24) dhe Bekim Sejdiu (23). Po ashtu, aty u vranë edhe Ilir Nebihu (30) dhe Beqir Rexhepi (30).

“Kur u ktheva në shtëpi, pashë fillimisht dy prej tyre të shtrirë pa jetë. Dy të tjerët i kishin futur brenda. Nuk është e lehtë ta përshkruaj atë moment. Ishte dhimbje e papërballueshme”, rrëfen ai.

Sipas dëshmisë së tij, forcat serbe hynë me dhunë në oborr dhe në shtëpi, duke qëlluar me armë zjarri dhe duke ushtruar dhunë fizike ndaj anëtarëve të familjes. Ai kujton se djemtë e tij ishin të rinj, studentë dhe shpresa e familjes për të ardhmen.

Masakra në Likoshan dhe Qirez rezultoi me 24 të vrarë. Përveç katër djemve të familjes Sejdiu dhe dy të tjerëve të vrarë në oborrin e tyre, jetën e humbën edhe: Rukie Nebihu (27, në muajin e shtatë të shtatzënisë), Xhemshir Nebihu (33), Ibish Rama (38), Behram Fazliu (50), Ismail Behrami (30), Gani Ahmeti (46), Ahmet Ahmeti (50), Hamzë Ahmeti (44), Hilmi Ahmeti (44), Driton Ahmeti (23), Naim Ahmeti (22), Lumni Ahmeti (19), Shemsi Ahmeti (18), Basri Ahmeti (18) dhe Elhami Ahmeti (16).

Në përleshjet e armatosura ndërmjet UÇK-së dhe forcave serbe në Drenicë ranë edhe Rexhep Rexhepi (63), Beqir Rexhepi (30), Muhamet Gjeli (70) dhe Naser Gjeli (38).

Kjo ngjarje konsiderohet ndër masakrat që tronditi opinionin vendas dhe ndërkombëtar. Në një raport të organizatës ndërkombëtare për të drejtat e njeriut Human Rights Watch, masakra në Likoshan dhe Qirez përmendet si një prej ngjarjeve që shënuan fillimin e fazës më dramatike të luftës në Kosovë.

Edhe pas 28 vitesh, dhimbja mbetet e thellë për familjarët e viktimave, ndërsa kujtimi për ta vazhdon të nderohet çdo vit.