Trump: Irani do të kishte pasur armë bërthamore nëse unë nuk do ta kisha ndërprerë marrëveshjen e Obamës

Presidenti amerikan Donald Trump pretendoi se nëse nuk do të ishte tërhequr nga marrëveshja bërthamore me Iranin e nënshkruar gjatë administratës së ish-presidentit Barack Obama, Teherani do të kishte zhvilluar tashmë një armë bërthamore.

“Nëse nuk do ta kisha ndërprerë Marrëveshjen e tmerrshme Bërthamore të Iranit (JCPOA) të Obamës, Irani do të kishte pasur një armë bërthamore tre vjet më parë,” shkroi Trump në platformën e tij Truth Social.

Ai e cilësoi marrëveshjen si “transaksionin më të rrezikshëm” ku kishte hyrë ndonjëherë SHBA-ja, duke shtuar se nëse do të kishte mbetur në fuqi, “bota do të ishte një vend krejtësisht tjetër tani”. Trump fajësoi drejtpërdrejt ish-presidentin Obama dhe presidentin Joe Biden për situatën aktuale.

Megjithatë, shumica e analistëve dhe inspektorëve të pavarur kishin arritur më herët në përfundimin se Irani po respektonte marrëveshjen JCPOA dhe po e mbante pasurimin e uraniumit nën kufijtë e përcaktuar, larg niveleve të nevojshme për prodhimin e armëve bërthamore.

Presidenti amerikan ka justifikuar gjithashtu sulmet e përbashkëta izraelito-amerikane ndaj Iranit me argumentin se ato synojnë të ndalojnë zhvillimin e armëve bërthamore nga Teherani.