Trump: Liderit të ri të Iranit nuk do t’i zgjasë shumë

Presidenti amerikan thotë se udhëheqësi i ardhshëm iranian duhet të ketë miratimin e SHBA-së

Presidenti i Shteteve të Bashkuara, Donald Trump, ka deklaruar se udhëheqësi i ri i Iranit nuk do të qëndrojë gjatë në pushtet nëse nuk merr miratimin e Uashingtonit.

Duke folur për mediat, Trump theksoi se iranianët duhet të zgjedhin një udhëheqës që do të jetë i pranueshëm për SHBA-në.

“Ai do të duhet të marrë miratimin tonë. Nëse nuk e merr miratimin tonë, nuk do t’i zgjasë shumë”

Presidenti amerikan shtoi se synimi i tij është të parandalojë që Irani të zhvillojë armë bërthamore.

“Nuk dua që njerëzit të kthehen pas pesë vitesh dhe të bëjnë të njëjtën gjë përsëri, ose edhe më keq, t’i lejojnë ata të kenë një armë bërthamore”

Kur u pyet nëse do të ishte i gatshëm të mbështeste një kandidat që ka lidhje me regjimin e mëparshëm iranian, Trump u përgjigj se kjo do të ishte e mundur nëse bëhet fjalë për një udhëheqës të mirë.

“Po, do ta bëja. Ka shumë njerëz që mund të kualifikohen”

Trump gjithashtu pretendoi se Irani kishte plane për të zgjeruar ndikimin e tij në rajon.

“Sipas tyre, plani ishte të sulmonin dhe të pushtonin të gjithë Lindjen e Mesme”

Ai shtoi se aktualisht Irani është dobësuar ndjeshëm.

“Ata janë një tigër letre. Nuk ishin një tigër letre një javë më parë, por tani janë”

Presidenti amerikan nuk përjashtoi as mundësinë e veprimeve të mëtejshme ushtarake kundër Iranit, përfshirë dërgimin e forcave speciale për të sekuestruar uraniumin e pasuruar.