15-vjeçari tentoi t’i sulmojë prindërit me thikë në Ferizaj, ndalohet për 24 orë

Një incident serioz familjar është shënuar paraditen e sotme në Ferizaj, ku një i mitur dyshohet se ka kanosur dhe tentuar t’i sulmojë prindërit e tij me mjet të mprehtë.

Sipas burimeve nga organet e hetuesisë, më 22.02.2026 rreth orës 10:00, Policia ka pranuar informacion për një rast të dyshuar të dhunës në familje në rrugën “Hasan Prishtina”.

Njësitë reaguese kanë dalë në vendin e ngjarjes dhe kanë shoqëruar palët në stacionin policor, ku janë intervistuar nga njësia e hetimeve.

Sipas deklarimit të ankueses, M.P.E., djali i saj R.E., 15 vjeç, ishte bërë i dhunshëm në shtëpi dhe kishte tentuar ta sulmonte atë dhe bashkëshortin e saj, A.E., me thikë. Dyshohet se i mituri ishte nervozuar pasi babai i kishte kthyer një familjari një motoçikletë, të cilën ai e kishte marrë pa leje ditë më parë.

Edhe dy dëshmitarë, A.E. dhe L.E., kanë deklaruar se i mituri kishte tentuar t’i sulmonte prindërit me thikë dhe kishte demoluar disa gjëra në shtëpi, duke i detyruar ata ta neutralizonin deri në mbërritjen e policisë.

Në vendin e ngjarjes është sekuestruar një thikë e markës Boker.

Në konsultim me Prokurorin e Shtetit nga Departamenti për të Mitur, rasti është iniciuar si “Kanosje”, sipas nenit 181 të Kodit Penal të Republikës së Kosovës, ndërsa i dyshuari është ndaluar për 24 orë.

Hetimet lidhur me rastin janë në vazhdim.