Aksioni në ARBK, MINT: Po hetohet një rast i ndryshimit të pronësisë së një biznesi

Njësitë për krime ekonomike kanë zhvilluar sot një aksion në Agjencinë për Regjistrimin e Bizneseve (ARBK), në kuadër të një hetimi që lidhet me ndryshimin e pronësisë së një biznesi pas vdekjes së pronarit.

Ministria e Industrisë, Tregtisë, Ndërmarrësisë dhe Inovacionit (MINT) ka bërë të ditur se rasti është në procedurë hetimore dhe lidhet me një çështje të trajtuar më herët nga vetë agjencia.

Sipas njoftimit, stafi i ARBK-së kishte konstatuar muaj më parë një keqinterpretim të një aktgjykimi gjyqësor, i cili më pas është korrigjuar përmes procedurave ligjore dhe administrative.

“Pas shqyrtimit të dokumentacionit dhe vendimeve relevante, është vërejtur se kishte ndodhur një keqinterpretim i një aktgjykimi, i cili më pas është adresuar sipas procedurave ligjore”, thuhet në reagimin e ministrisë.

MINT thekson se institucionet përkatëse janë duke bashkëpunuar ngushtë me organet e rendit dhe drejtësisë për të sqaruar plotësisht rrethanat e rastit.

Nga ana tjetër, ministria ka siguruar se do të vazhdojë angazhimin për rritjen e transparencës dhe sigurisë juridike në funksionimin e ARBK-së.

Sipas burimeve, gjatë këtij aksioni për intervistim janë shoqëruar ushtruesja e detyrës së kryeshefes së ARBK-së si dhe dy zyrtarë të tjerë.

/Zëri i Drenices/