Gjykata detyron MKRS-në të kompensojë familjen e 3-vjeçares që humbi jetën në Prizren

Procesi civil lidhur me vdekjen tragjike të 3-vjeçares Xh.G., e cila humbi jetën pas shembjes së një muri në rrugën “Marin Barleti” në Prizren më 6 qershor 2016, ka përfunduar me vendim të Gjykata Themelore në Prizren – dega në Suharekë.

Sipas aktgjykimit, Ministria e Kulturës, Rinisë dhe Sportit (MKRS) obligohet që t’i paguajë nënës së viktimës shumën prej 15 mijë eurosh në emër të dëmit jomaterial për dhimbjet shpirtërore, ndërsa vëllait të mitur të viktimës 8 mijë euro për të njëjtën bazë ligjore. Po ashtu, gjykata ka vendosur që të kompensohen edhe 2 mijë euro për shpenzimet e varrimit dhe ngritjes së përmendores.

Në vendim është përcaktuar edhe kamatë ligjore prej 8 për qind në vit, e cila do të llogaritet deri në përmbushjen përfundimtare të obligimit financiar. Ndërkohë, pjesa tjetër e kërkesëpadisë së paraqitur nga familja është refuzuar si e pabazuar.

Rasti i vitit 2016 kishte tronditur opinionin publik, pasi shembja e murit në një zonë të frekuentuar të qytetit kishte ngritur pikëpyetje mbi përgjegjësinë institucionale për mirëmbajtjen dhe sigurinë e objekteve nën administrim shtetëror. Vendimi i fundit i gjykatës përmbyll një proces të gjatë gjyqësor civil, duke sanksionuar përgjegjësinë financiare të institucionit përkatës.